Պոլիոմիելիտ` արտակարգ իրավիճակ

2012թ. այս վիրուսային հիվանդության դեպքերի նվազում է նկատվել: Միայն 3 երկիր (Աֆղանստան, Նիգերիա և Պակիստան) պոլիոմիելիտի առումով համաճարակային են համարվում: 1988թ. այդ երկրների թիվը 125-ն էր, սակայն ԱՀԿ-ի ներկայացուցիչներն անհանգիստ են. ներկայումս կազմակերպությունը բավարար միջոցներ չունի այդ վտանգավոր հիվանդության դեմ պայքարելու համար:

Հավանական է, որ, հատկապես, ֆինանսների բացակայությունն էլ կհանգեցնի պոլիոմիելիտի հերթական բռնկմանն ամբողջ աշխարհում:

ԱՀԿ-ի փորձագետները հայտարարել են, որ ներկայումս հիվանդությունը կարելի է բնորոշել որպես «այժմ կամ երբեք,  բեկումնային պահ` հաջողության և տապալման միջև»: Եթե արտակարգ միջոցներ չձեռնարկվեն, ապա հաջորդ տասնամյակներում ամբողջ աշխարհում պոլիոմիելիտից կմահանա մինչև 200 000 երեխա:

Պոլիոմիելիտի դեմ առաջին պատվաստումը մշակվել է դեռ անցյալ դարի 50-ական թվականներին, երկրորդ ՙխմբագրումը՚ թույլ տվեց հիվանդության դեպքերը կրճատել 99%-ով: Այնուամենայնիվ, վերջին տարիներին հիվանդությունն արմատապես վերացնելու փորձերը ոչ մի արդյունք չեն տվել: Միջոցները չեն բավականացնում:   Աֆղանստանում, Պակիստանում և Նիգերիայում պոլիոմիելիտի դեմ պայքարելու համար այս տարի անհրաժեշտ է 1 մլրդ, մյուս տարի` 2 մլրդ դոլար: Կա ևս մեկ խնդիր: Այս երկրներում, որտեղ մինչև հիմա մարտական գործողություններ են տեղի ունենում, շատ դժվար է պատվաստում կատարելը: Բժիշկների աշխատանքին խոչընդոտում են նաև  հոգևոր առաջնորդները, ովքեր մեծ ազդեցություն ունեն իրենց ցեղակիցների վրա և արգելում են նրանց պատվաստումներին մասնակցել:

Փաստեր պոլիոմիելիտի մասին

ԱՀԿ. պոլիոմիելիտը վիրուսով հրահրված բարձր ինֆեկցիոն հիվանդություն է: Այն ախտահարում է նյարդային համակարգը և մի քանի ժամ անց կարող է հանգեցնել ընդհանուր հաշմանդամության: Վիրուսն օրգանիզմ է թափանցում բերանի միջով և բազմանում աղիներում: Առաջին ախտանիշներն են` տենդը, հոգնածությունը, գլխացավը, սրտխառնոցը, պարանոցի ռիգիդությունը/ձգվածությունը և վերջույթների ցավը: Արդյունքում 200-ից  մեկի մոտ առաջանում է կաթված (սովորաբար, ոտքերի): Հիվանդների 5-10%-ը մահանում է շնչառական մկանների կաթվածի պատճառով: Հիվանդության առավելագույն ռիսկի հակված են մինչև 5 տարեկան երեխաները: Պոլիոմիելիտն անբուժելի է, այն հնարավոր է միայն կանխարգելել: Մի քանի անգամ կատարված պատվաստումը կարող է երեխային օգնել ամբողջ կյանքում:

Հարցեր, պատասխաններ, մեկնաբանություններ